Litclub.ge

*** მზე ღრუბლებიდან გამოქექილი

მზე ღრუბლებიდან გამოქექილი,

ისევ ნაცარში არის ჩამძვრალი,

შეხსნილ პერანგში ირმის რქებივით,

გაშლილა შენი ლავიწის ძვალი.

 

ღამე იღვრება როგორც ნავთობი,

მზე კი ჩამქრალი ასანთის ღერი,

მოულოდნელად გახდი დამთმობი,

მოულოდნელად გახდა დამღლელი -

 

ის მისამღერი რომ ღიღინებდი,

შენ უფრო მეტი გაქვს გასამხელი

და ხერხემალზე როგორც ღილები,

გახსნას ითხოვენ შენი ხალები.

 

ნუ გაზღაპრდები, ნუ გამითდები,

ნუ დაუჯერებ ამბებს არაკებს,

ვალაპარაკოთ ჩვენი თითები,

სანამ თითები გვალაპარაკებს.