მებრალება თებერვალი,

ხან წყალია, ხანაც თიხა,

თავზე ზამთრის ცოდვა-ბრალი

აგურებად დაიტეხა.

მოარტისტობს შლეგი მარტი,

რიტორიკულ რეტრო ნოტად,

მოიკითხავს კარავს ნატვრის,

კვლავ ისესხებს დროს, _ იოტას.

აფეთქებამ კვირტი გათქვა,

ძუ სურვილებს აღარ სძინავთ,

ღრუბლის მაქვით, სირმის ძაფად,

მოდის ქოროდ, სევდის წვიმად...

უცებ ქუფრი ფიქრიც გაქრა,

ბაღი ღობის აზღუდს იკრავს,

დღემ იმატა მთელი აკრით, _

მამცნო ჩიტმა, ცის შიკრიკმა.