ცვეტაევა მარინა
გაზიარება

* * * მომწონს, რომ ავად არა ხარ ჩემით... (თარგმანი: ჟუჟუნა ხაჯიშვილი)  

მომწონს, რომ ავად არა ხარ ჩემით,
მომწონს, რომ თქვენით არა ვარ ავად,
რომ ფეხქვეშ მიწა მძიმე და სველი 
არ გატოკდება სულისშემძრავად.
რომ სასაცილოდ თავისუფალი
არ ვთამაშობდე ყალბი სიტყვებით
და არ გავწითლდე, როცა უბრალოდ
ერთურთს თითებით ველაციცებით.

და კიდევ მომწონს, გიცქერით როცა
ეხვევით ვინმეს მოურიდებლივ
და არ მიგზავნით გეენას კოცონს,
მეც საკოცნელად რომ არ მინდებით.
რომ ჩემს ხსენებას სათუთად თქვენში
არც დღით, არც ღამით არ გაუვლია,
რომ დიდი ტაძრის სიმყუდროვეში
არავინ გეტყვის ალილუიას!...

მადლობას გიხდით გულით და ხელით,
გულით და სულით მადლბას გიხდით.
მადლობას გიხდით - გიყვარდით ისე,
რომ თქვენ თავადაც ვერაფერს მიხვდით.
მადლობას გიხდით ამ სიმშვიდისთვის
და იშვიათი შეხვედრებისთვის,
მთვარიან ღამით, დაბინდებისას
ჯერ არ შემდგარი პაემნებისთვის.
რომ თავს არ გვადგას გვირგვინის დარად 
ჩვენ შარავანდი ცხელი და მწველი,
ვწუხვარ, რომ ჩემით არა ხართ ავად,
ვწუხვარ, რომ ავად არა ვარ თქვენით!

??????